پاکستان موسمیاتی تبدیلی سے سب سے زیادہ متاثرہ 10 ممالک میں شامل ہے، جہانزیب سالک

 

پاکستان موسمیاتی تبدیلی سے سب سے زیادہ متاثرہ 10 ممالک میں شامل ہے، جہانزیب سالک

مردان(دی نیوز پوائنٹ اردو ) پاکستان سمیت دنیا بھر کی طرح مردان میں بھی  قدرتی ماحول کے تحفظ اوردرپیش مسائل اجاگر کرنے کے لیے ماحولیات کا عالمی دن منایا گیا۔ اس حوالے سے مردان میں سول سوسائٹی کی جانب سے پی پی اے ایف اور سالک ڈیویلپمنٹ فاونڈیشن کے تعاون سے عالمی یوم ماحولیات کے مناسبت سے ایک مختصر واک کا اہتمام کیا گیا، 

شمسی روڈ مردان سے واک کرتے ہوئے شرکاء مردان پریس کلب پہنچے،واک سے خطاب کرتے ہوئے سالک ڈیویلپمنٹ فاونڈیشن کے صدر حاجی جہانزیب سالک، زمونگ جذبہ ویلفیئر سوسائٹی مردان کے چئیرمین محمد پرویز،سائبان ڈویلپمنٹ آرگنائزیشن کے محمد عارف،لیبر ایجوکیشن آرگنائزیشن کے حسن حساس،پارٹ آرگنائزیشن کے فیاض الا سلام، ڈسٹرکٹ کوآرڈینیشن کونسل مردان کے سینئر نائب صدر عنایت الرحمان، ڈی آر سی خاتون ممبر نصرت آرا و دیگر نے خطاب کرتے ہو ئے کہا کہ  پاکستان موسمیاتی تبدیلیوں سے متاثر ہونے والے پہلے 10ممالک میں شامل ہے، موسم گرما میں ہیٹ ویوو ناقابل برداشت تو موسم سرما میں سردی کی شدت میں بھی اضافہ ہو رہا ہے، 

موسمیاتی تبدیلیاں خطے میں کبھی خشک سالی تو کبھی تباہ کن سیلاب کا پیش خیمہ بھی بننے لگیں۔انہوں نے کہا کہ موسمیاتی تبدیلیوں کے تباہ کن اثرات سے نمٹنے کیلئے حکومتی سطح پر موثر پالیسیوں کی تشکیل کے علاوہ ہر فرد کو اپنی انفرادی ذمہ داری کا ادراک بھی کرنا ہو گا۔

ماہرین نے خبردار کیا ہے کہ موسمیاتی تبدیلیوں سے نمٹنا ہے تو نا صرف جنگلات کی بے دریغ کٹائی اور پانی کے ضیاع کو روکنا ہو گا بلکہ پلاسٹک سمیت آلودگی پھیلانے والے دیگر ذرائع کا تدارک بھی کرنا ہوگا۔