کشمیری مسلمانوں کی جدوجہد آزادی ضرور کامیاب ہوگی،کمشنر مردان نثار احمد
پاکستانی عوام کشمیری بھائیوں کے ساتھ ہر لمحہ کھڑے ہیں،ڈی پی او مردان ظہور بابر آفریدی
عالمی برادری سے اپیل کی کہ وہ ان کے بنیادی حقوق کے تحفظ کے لیے عملی اقدامات کرے،ڈی سی مردان عظمت اللہ وزیر
مردان(دی نیوز پوائنٹ اردو،ایم وقار خان)یوم یکجہتی کشمیر کے حوالے سے پختونخوا ہاؤس میں خصوصی تقریب ہوئی۔جس میں کمشنر ڈویژن مردان نثار احمد مہمان خصوصی تھے۔
تقریب میں ڈپٹی کمشنر مردان ڈاکٹر عظمت اللہ وزیر, ڈی پی او ظہور بابر آفریدی، سیکرٹری ٹو کمشنر سارا تواب، اے ڈی سی فنانس فہد افتخار، سرکاری افسران، میڈیا، سول سوسائٹی، سکولوں کے طلبہ و طالبات نے شرکت کی۔
کشمیری بھائیوں کے ساتھ اظہار یکجہتی کے لیے ایک منٹ کی خاموشی اختیار کی گئی۔
سکول کے بچے بچیوں نے قومی نغمے، ترانے، تقاریر اور ٹیبلو پیش کیے جن میں کشمیری مسلمانوں کی قربانیوں کو اجاگر کیا گیا اور ان پر بھارتی قابض فوج کے ظلم و بربریت کی منظر کشی کی گئی۔
مقررین نے کشمیری مسلمانوں پر بھارتی غاصب فوج کے مظالم کی مذمت کی۔ انہوں نے کشمیر میں انسانی حقوق کی خلاف ورزیوں پر عالمی ضمیر کی خاموشی کو افسوسناک قرار دیا۔
تقریب سے خطاب کرتے ہوئے کمشنر مردان نثار احمد نے کہا کہ کشمیری مسلمانوں کی جدوجہد آزادی ضرور کامیاب ہوگی۔ انہوں نے کہا کہ مسئلہ کشمیر کو کشمیری عوام کی امنگوں اور اقوام متحدہ کی قراردادوں کے مطابق حل کیا جائے۔ انہوں نے اقوام متحدہ اور انسانی حقوق کے اداروں پر زور دیا کہ وہ کشمیر میں بھارتی مظالم اور انسانی حقوق کی سنگین خلاف ورزیوں کا نوٹس لیں۔
کمشنر مردان نے کہا کہ یہ دن ہمیں یہ احساس دلاتا ہے کہ آزادی کتنی اہم ہے اور ہمارے اسلاف نے آگ و خون کے دریا پار کر کے ہمارے لیے آزادی حاصل کی جس کی ہمیں قدر کرنی چاہییے۔ انہوں نے کہا کہ ہندوستان نے مقبوضہ کشمیر کی خصوصی حیثیت کا خاتمہ کرکے وہاں کی ڈیموگرافی تبدیل کرنے کی کوشش کی ہے۔
ڈی پی او مردان ظہور بابر آفریدی نے تقریب سے خطاب کرتے ہوئے کہا کہ پاکستانی عوام کشمیری بھائیوں کے ساتھ ہر لمحہ کھڑے ہیں اور ان کی جدوجہد آزادی کو خراجِ تحسین پیش کرتے ہیں۔ انہوں نے کہا کہ کشمیر کی آزادی کے لیے دی جانے والی قربانیاں تاریخ میں ہمیشہ یاد رکھی جائیں گی، اور مردان پولیس ہر فورم پر کشمیری عوام کی حمایت جاری رکھے گی۔
ڈپٹی کمشنر مردان ڈاکٹر عظمت اللہ وزیر نے بھی تقریب سے اپنے خطاب میں کشمیری عوام کے ساتھ مکمل یکجہتی کا اظہار کرتے ہوئے عالمی برادری سے اپیل کی کہ وہ ان کے بنیادی حقوق کے تحفظ کے لیے عملی اقدامات کرے۔
پاکستان اپنے کشمیری بہن بھائیوں کی جدوجہد آزادی میں ان کے ساتھ ہے اور کشمیری مسلمانوں کی قربانیوں کی بدولت کشمیر آزاد ہو کر پاکستان کا حصہ بنے گا۔ آخر میں کمشنر مردان نثار احمد اور ڈپٹی کمشنر ڈاکٹر عظمت اللہ وزیر نے واک کی قیادت کی۔
کاٹلنگ میں کشمیر ڈے کے حوالے سے منعقدہ تقریب سے ایڈیشنل اسسٹنٹ کمشنر کاٹلنگ سحر انور اور پولیس کے آفسران،جوانان،علمائے کرام،اساتذہ کرام اور سکولز کے طلباء نے کہا کہ کشمیریوں پر مظالم، بے گناہ قتل عام بند کیا جائے۔
5 فروری یوم یکجہتی کشمیر کے حوالے سے ارفع ایجوکیشن سسٹم کاٹلنگ کی جانب سے ایک اہم تقریب کا انعقاد کیا گیا، جس میں پرنسپل سعید الرحمان نے کشمیریوں کے حق میں اظہار یکجہتی کرتے ہوئے کہا کہ "5 فروری مظلوم کشمیریوں کے ساتھ ہماری بھرپور حمایت کا دن ہے۔
ایک تبصرہ شائع کریں